Herritar Batasunaren inguruko eztabaida berpizten ari den une honetan, aproposa iruditu zaigu ekarpen  moduan ideia hauek iritzi artikuloa bezala plazaratzea. Txosten osoa:  http://www.euskoekintza.eu/herritar-batasunaren-garaia-da-manifestua/#more-1993

Herritar Batasunaren  helburu nagusia independentziarako eta sozialismorako  bidean Ezker Abertzaleko masa kritiko militantearen aktibazioa litzateke. Militantzia “kritikoa” militantzia aktibo eta trebatua da. Herrietako dinamika soziopolitikoetan partaide, modan dagoen militantzia “birtual” eta desideologizatuatik aldenduta. Finean, herri boterearen oinarria den militantzia.

HB taldeez nahiz norbanako militanteez osatuko litzateke. Ez soilik alderdi politikoekin, baizik eta sindikatu, eta hainbat herri mugimenduekin: gazteria, amnistiaren aldeko eta errepresioaren aurkakoa, feminista, oroimen historikoa, naziogintza, ekologia, euskara, antifaxista, … Maila nazionalean zein  eskualde mailan eratutako taldeez ari gara. Antolaketa honek herri eta auzoen indar  handitzea eta deszentralizazioa dakar, baita herri taldeen autonomia handiagoa izatea dinamismoa sustatuz.

Herritar Batasunean, Independentzia eta Sozialismorako bidean taktika eta estrategiaren marra gorriak definituko dira denon artean, eta eragile eta militante guztiak, adostutako marra hauen barruan mugituko dira, berauen arlotan arituz.

Modu honetan, Herritar Batasuna, osatzen duten talde eta norbanakoen aberastasun ideologikoa gordeta, aldi berean, partekatutako lerro taktikoak eta estrategia bera segituko duen elkarlanean aritzeko egitura sortuko du. Horrela EA bere osotasunean koordinazio kolegiatuaz eta autogestionatuaz hornituko da.

Aldi berean Herritar Batasuna mugimendu soziopolitikoari edo herri mugimenduari lotutako nazio edo herri erakunde berriak sortzeko mintegia izan daiteke.

Herritar Batasunaren egiturek eta funtzionamenduak bi ardatz batu beharko ditu: Mugimendu iraultzaile independentista osoa, eta honen barruan, elkarrekin aritzen diren mugimendu sektorial ezberdinak. Horrela Estatuen errepresioa eta bestelako erasoen aurka eraginkorragoa da,  baita borroka frente ezberdinak (nazionalak, eskualdekoak, herrikoak) sortzeko eta jendarte aldakor honen eskaerei, beharrei eta kezkei erantzuteko orduan ere.

Ezker Abertzaleak ez du kalea soilik berreskuratu behar, xarma eta kalean borrokatzeko poza ere bai.

Azken urteotan, Ezker Abertzale ia osoan kultura bertikalista txertatu da non erabakiak bakar batzuek hartzen dituzten. Batzuk ilegalizazioez baliatu dira berauen egitura alderdikoi eta bertikala sortzeko. Hegemonismoa, aldiz, militante eta bozkak galtzeko bide motzena dela agerian geratu da.

Premiazkoa dugu pentsamendu politikoaren hauspotzea eta baita militantziaren formakuntza ere. Masa kritiko indartsu batek soilik bermatuko du gure aurkako inguru mediatikoaren aurrean, eta baita gogorki despolitizatua eta desideologizatua izan den jendartean aurrera egitea.

Finean, Herritar Batasuna Estatuen  eta Kapitalaren kontrako borrokarako tresna da. Alderdi bakarra, berriz, Ezker Abertzalea egungo egitura instituzionaletan diluitzeko tresna.

Herritar Batasuna herri, eskualde eta nazional mailan antolatuko genuke. Herritar Batasunak hornituko duen eskualde eta nazional mailaren barruan hainbat “aparatu” edo lan taldeak osatzen.

Kataluniako CUPen esperientzia eta maila praktikoan zein teorikoan egiten ari diren lan guztia, baliagarria gerta dakiguke gure formulazio ideologikoetan eta praktikoetan.

Ezker Abertzalean historikoki pertsonak modu eta inplikazio maila ezberdinez aritu dira. Horregatik, HB militante mota ezberdinez osatuta egongo da: militante aktiboak eta eguneroko lanetan konprometituak, edo konpromiso apalagoa dutenak.  Bakoitza bere estatus propiorekin. Sare sozialei dagokionez, salaketa, hitzorduak, mobilizazioak antolatzeko baleko tresna izanik, ez dira ordea militanteak parte-hartze politikorako funtsezko tresnak.

Gure proposapenak bertikalismotik autogestiora pasatzea suposatuko du; Herritar Batasunaren kultura berreskuratuz. Herritar Batasunak “komunitate soziopolitiko” baten kide izatearen sentimendua berreskuratuko luke ezker abertzaleko masa sozialarentzat. Sentimenduak eta subjektiboa dena gestionatzeko garrantzia ezin baitugu ahaztu.

Une hauetan  Herritar Batasuna sortzeko nahiko baldintza badagoelakoan gaude. Aldi berean gero eta denbora gehiago pasa orduan eta zailagoa izango zaigu egoerarekin nazkaturik etxera joan diren militanteak berreskuratzea.

Garrantzitsua da Herritar Batasunaren eta  hauteskundeetarako eta instituziorako Fronte Zabala bereiztea. Fronte Zabala beste talde batzuekin adostutako hauteskundeetarako eta  instituzio kudeaketarako gune partekatua da. Herritar Batasunak motorra izan behar du, ez bakarrik hauteskundeetan edo instituzio mailan, baizik eta gune guztietan.

Azkenean, estrategia nazional bat izan beharko dugu, Herritar Batasuneko erakunde ezberdinetako zientoka koadroek sortutakoa eta partekatutakoa. Hau da, gure ustez, Euskal Herriaren  askapen nazional eta sozialerako prozesuaren berraktibaziora eramango duen oinarria.

Txarli Glz. Llorente eta Gotzone Rekondo. (Eusko Ekintzako militanteak)

Euskal Herria, 2016ko abuztuaren 20an.

Pasa den larunbatean Eusko Ekintza alderdiak (EEK)-K, bere aurkezpen ofiziala egin zuen Altsasun manifestu zabal baten bidez. Hurrengo asteetan Talde Sustatzailea osatu dugun  kideok behin-behineko Batzar Nazionala eratzeko asmoz, zabalagoa den lantalde dinamizatzailea elkartzeko asmoa dugu.

Eusko Ekintza ezker abertzalearen eremu zabalean kokatzen da, egun berrantolatzen ari den esparru soziopolitiko horretan hain zuzen. Izan ere, ezker abertzaleak Euskal Herriko sektore anitzak batu baldin baditu historikoki, esan dezakegu azken urteetan oinarri soziologiko hau are eta gehiago zabaltzen ari dela.

Bestalde, ohartu gara hainbat jendearentzat, eta bereziki militante gazteen belaunaldiengan, nahasmen handia dagoela Herritar Batasuna, Gune Soberanista zein alderdi politiko kontzeptuen artean. Hori dela eta, saiatuko gara ekarpen bat egiten Herritar Batasunari buruz gure ikuspegia argitze aldera.Euskal Herrian, Ezker Abertzalea inoiz ez da alderdi bakarrean antolatu. Ezker abertzale soziologiko osoak beti hainbat adierazle politiko, sindikal eta sozial izan ditu. Herri Batasuna eta Euskal Herritarrok izan dira agian ezker abertzalearen erakunde gehien batzea lortu duten egiturak, eta beti herritar batasunaren ereduaren inguruan. Hala ere, kasu hauetan soilik erakunde politikoak batzen ziren, nahiz eta beste eragile sindikal edo soziopolitikoekin lotura estua izan.

Ezker abertzalearen eragile guztiek estrategia bateratua izan dezaten laguntzeko asmoz, sortu da, besteak beste,  Eusko Ekintza. Herritar Batasuna bultzatzeko, alegia. Aurkezpen testuan horrela adierazten dugu:

“Ezker Abertzalea, historian zehar, alderdi bakarrean batu ezinak diren libertario, komunista eta sozialista ideologiaz osatu da. Langile eta klase herritarren aliantza historikoa  izan da Ezker Abertzalea, eredu demokratikoa izan duena beti, anitza eta parte-hartzailea. Horregatik hain zuzen, errepresio gupidagabeari erresistentzia tinkoa ezartzeko tresna eraginkorra izan da. Herritar Batasuna, berriz, konfrontazio demokratikorako tresna izan da.

Begi onez ikusten dugu Euskal Herriko jendartea ideologia ezberdinetako alderdietan eta erakundeetan antolatzea. Eta esan gabe doa, gure helburua ez dela alderdi  hegemoniko bat izatea, Eusko Ekintza ezkerreko indarrez osatuta egon behar duen Herritar Batasun batean parte izateko jaio da, Herritar Batasun bat zeinek independentzia  lortze bidean, gune soberanista eta aliantza zabalak lortzeko motorra izan behar duen. Baita sozialismoaren etxea harriz harri eraikitzen hasi beharko duen indar ezkertiarren elkarlanean zutabea ere” .

Eusko Ekintzaren aurkezpen egunean Laura Mintegi EHbildu koalizioaren zerrendaburuak,  Eusko Ekintzarekin hartu-emana izatea espero duela esan zuen. Gu ere horren esperoan,  gainontzeko indar eta gune ezkertiar,  aurrerakoi eta independentistekin auzolana gure ipar-orratza izango dela esan dugunontzat, eskertzekoak dira hitz horiek.

Eusko Ekintza alderdia eratzen ari garen emakume eta gizonok Bildu, Amaiur eta EHbildu koalizioen esparrua gure kokapen naturaltzat ikusten dugu hauteskunde esparruan. Gutako hainbatek, koalizio hauen sorrera prozesuan parte hartu genuen aktiboki. Halere, hiru koalizio hauek Hegoaldean burututako azken hiru hauteskundeetarako koalizioak baino ez dira, eta oraindik ez dira koalizio iraunkor gisa moduan egituratu. Urruti daude beraz “gune soberanista” eraginkor eta egonkor izatetik. Horretarako herritarrekiko, talde ezberdinekiko eta herritar mugimenduekiko lankidetza eta konplizitate guneak sortu beharko lirateke.

Eusko Ekintzak Ipar Euskal Herrian eta Hegoaldean ezker independentismoa Herritar Batasun batean egituratzea helburutzat jotzen du. Pertsonez, sentsibilitate zein alderdi eta erakunde soziopolitikoez osatutako Herritar Batasuna.

Herritar Batasuna hauteskundeetarako koalizio batetik harago doa, egitura eta erabakiak hartzeko prozedurak arautu behar dituelako. Gauza berbera esan dezakegu Gune Soberanistaz, non esker abertzaleko eremukoak ez diren taldeekin auzolan handia dugu independentziarako bidean.

Horrela izanda, Eusko Ekintzaren lehengo Nazio Biltzarra egin bezain laster, gure ahalegin handiena Herritar Batasunaren sorkuntza horren baitan kokatuko dugu, sistema juridiko-politikoa eta sistema sozio-ekonomikoa aldatzeko behar diren indarrak ezkertiarrak diren sektore soberanista guztien elkarlanetik baino ez baitira etorriko.