Gaur beste zazpi euskaldun atxilotu ditu espainiar poliziak Donostian eta Gasteizen “terrorismo goratzea” akusaziopean.  Atxiloketa hauei gehitu behar zaizkie duela bi egun Otxandion atxilotutako beste lau lagun, akusazio berberakin. Gainera berriki jakin da Tafallako alkatea inputatua izan dela presoen aldeko  “Euskal presoak Euskal Herira” ohiala udaletxean erakustegagatik. 12 inputatu berri 3 egunetan. Aste beltza. Garai berririk ez. Zaharrak berri. Salbuespen egoerak eta legeriak indar betez diraute Euskal Herrian.

Ezker Abertzalearen errelatoa eta preso politikoekiko elkartasuna kriminalizatzen dituzte gero “elakarbizitzaz” eta errelatu partekatuaz hitz egiten duten betiko errepresoreek.

Oroimena eta elkartasuna ezin dira delituak izan.

Honen aurrean, atxilotutako eta inputatuei gure elkartasuna luzatzen diegu eta antolatutako mobilizazioetan parte hartzera deitzen dugu. Beste aldetik salbuespen legeei eta egoerari bere osotasunean erantzuteko, beharrezkoak diren tresnak sortzeko, eta abian direnak indartzeko dei egiten dugu.

Premiazkoa ikusten dugu eskubide zibil, sozial eta politikoak defendatzeko plataforma handi bat, taldez zein pertsonaz osatua (garai batean Adierazi Euskal Herria izan zenaren antzekoa) eta Amnistiaren Aldeko eta Errepresioaren Aurkako Mugimendua herriz herri eta auzoz auzo indartzea. Inoiz baino beharrezkoagoa baita.

Eusko Ekintza.

Euskal Herria, 2015ko irailaren 17a.

Otxandioko herrian gaur izandako lau atxiloketen aurrean, Eusko Ekintza erakunde soziopolitikoak zera adierazi nahi du: Lehenik eta behin gure erabateko elkartasuna atxilotutako kidekin zein beraien famili eta senidekin. Baita errepresioak hainbat aldiz kolpatutako Otxandioko herriarekin.

Batzuek aldarrikatzen duten bitartean atxiloketa hauek “iraganeko” gauzak direla, Euskal Herrian gero eta sektore eta eragile gehiagok garbi dugu, zoritxarrez, estatuen errepresioa ez bakarrik eguneroko ogia dela, baizik eta areagotzen dihoan zerbait. Dena Euskal Herriaren askatasun nazional eta eskubide sozialak ukatzeko bidean. Ez da asterik pasatzen inputazio, atxiloketa, preso politiko berri edo edo parekoarekin. Hau errealitate ukaezina da edozein diskurtso “zuri” ren aurrean.

Gure galdera zera da; posiblea al da hainbat alderdiek “biktimen” eta “normalizazio politikoaz” garai berrien jokura jolastea bitartean errepresioak biktima eta kaltetu berriak etengabe sortzen dituen bitartean?

Eusko Ekintzatik behin eta berriro aldarrikatuko dugu Ezker Abertzalearen eskubidea Euskal Gatazkaz gure errelatu propio izateko eta jakina, errelato hori kriminalizatua ez izateko eskubidea. Beste edozein planteamendu guztiz totalitarioa izateaz gain, herri honen elkarbizitzaren aurkako eraso  zuzena da. Atxiloketa hauek bezalaxe.

Euskal Herrian, 2015ko irailaren 15a.

Une honetan, Jone Amezaga Errigoitiako gaztea espetxeratzeko arriskupean dago. Bere delitu bakarra pankarta bat jartzea da. Gaur ere ezagutu dugu beste hiru pertsona atxilotuak izan direla “terrorismoaren apologia” delakoa egotzita Arabako Laudio herrian iaz hitzaldi bat emateagatik. Deneri gure elkartasuna adierazi nahi diegu, gure herrian lekurik ez duen  salbuespen legeri baten biktimak direlako gure ustetan.

Euskal Herrian salbuespen egoerak ez du etenik. Salbuespen egoeraren legediaren itzalpean bizi gara, eta salbuespen legediak etengabe egoera honen biktima sozio-politikoak sortzen ditu. Salbuespen legeria honen lehendabiziko biktimak adierazpen askatasuna, adierazpen soziopolitiko libreak, zein euskal herritarrok bizi dugun gatazkaren inguruan kontakizun ezberdinak izateko eskubideak dira. Batzuk (PP-PSOE) prest daude beraien errelatoa euskal gizarteari inposatzeko, etengabe herritarrak espetxeratzeko.

Salbuespen legeri espainiarrak bultzada politiko argia du. Erabaki politiko baten ondorioa da. Horregatik, biktimizazio prozesuan etengabe biktima eta errepresaliatu berrian  katea behingoz mozteko unea heldu da. Zurikeria guztiaren gainetik, salbuespen legedien iraupena une honetan, euskaldunon elkarbizitzarako lehendabiziko oztopoa da.

Eusko Ekintzatik, Salbuespen legediaren amaiera exijitzeaz gain, honako hausnarketa egiten dugu:

• Posiblea al da, ustez elkarbizitza bultzatzeko elkarrekiko ekitaldiak egitea salbuespen egoera hau mantentzen duten alderdiekin?
• Posible al da, izandako biktimen aldeko ekimenak partekatzea une honetan biktima berriak sortzen ari diren indar politikoekin?

Euskal Herria, 2014ko azaroaren 27an.

Gaur gertatutako Herrira erakundearen 18 euskal militanteen atxiloketak bereziki larriak dira.  Larriak ETAk duela bi urte borroka armatua betiko baztertu zuelako, eta larriak berriro ere Euskal Herrian bere jarduera soziopolitiko soilagatik lagun multzoa atxilotu dutelako.Larria kartzelak preso politikoez hustutzeko garaian, Estatuek betetzen jarraitzen dutelako. Larria guzti honengatik PP, PSOE eta UPN alderdiek salbuespenezko neurri eta legediak mantentzeagatik ordaindu beharreko prezio soziopolitikoa ez direlako ordaintzen ari. Zoritxarrez, bihar, batzuek “normaltasun” politikoaren irudia ematen jarraitu nahiko dutelako erakundetan, normala balitz Mendebaldeko Europan 18 herritar atxilotzea salbuespen legeak eskuan.

Une hauetan esatea inolako normalizazio prozesu politikorik ez dagoela balio beharko luke hainbat sektoreek errealitatearen aurrean kartolak behingoz kentzeko.

Ilegalizazio eta arrazoi politikoengatik espetxeratzen  zikloa ez da amaitu, eta ez da amaituko salbuespen legeri guztia eta bere ondorioak konpondu arte.

Aldebakartasunean urrats berriak emateko unea da. Egia esanda, unea aspaldidanik heldu zen.

Herri honek behar ditu tresna herritarrak, horizontalak, zabal eta eraginkorrak, talde eta kolektibo anitzez osatuak,  errepresioari aurre egiteko. Guretzako, argi eta garbi aldarrikatzen dugu, Adierazi Euskal Herria bezalako bilgune zabal baten beharrean gaude estatuen errepresioari bermeekin aurre egiteko.

Eusko Ekintzak bat egiten du atxilotuei elkartasuna adierazteko eta polizi operazioa salatazeko deitutako mobilizazioekin. Aldi berean gure erabateko elkartasuna adierazi nahi diegu atxilotuei zein Herrira-ko militante oroei.

Euskal Herrian, 2013ko irailaren 30.

Berriki jakin da Luis Goñi eta Xabier Sagardoi gazte nafarrek Espainiako Auzitegi Gorenaren epaia jaso dutela.

Iruñerriako bi gazteek espetxeratu nahi dituzte beraien militantzia politikoa dela eta.

Denbora aurrera doa eta gero eta garbiago geratzen ari da euskaldunok ezin dugula inolako keinurik espero espainiar Estatuaren aldetik errepresio bideak ixteko, eta horrela euskal gatazkaren hainbat korapiloa askatzeko. Keinu hauek bakarrik behartuak emango dituzte, herri presioaren bidez, alegia.

Nabarmen geratzen ari dira aldebakartasunaren estrategiaren mugak, aldebakartasun estrategia honetan ez baldin badira erabiltzen konfrontazio demokratikoaren tresna guztiak.

Batzuek diote legea bete behar dela, baina egungo salbuespen legeria erabaki politiko baten ondorioa da, eta hura desaktibatzea erabaki politikoa izango da. Hau gogoratzea komeni da legea sakralizatzen dutenen aurrean. Bereziki legea herrien borondatearen kontra doanean.

Eusko Ekintzak bat egiten du bi gazte hauen alde deitutako mobilizazioekin eta bereziki “Herri harresia”  ekimenarekin.

Intsumisio eta desobedientzia zibileko ekintza baketsuak baina irmoak gero eta tarte gehiago hartu beharko dute aldebakartasunaren estrategian, baldin eta estatuek zerbait mugituko badute euskal gatazkaren korapiloak askatzeko bidean.

Euskal Herria, 2013ko uztailaren 24ean

Gaur goizaldean, Ertzaintzak Donostiako Askegunean burututako sei gazte independentisten atxiloketa dela eta, Eusko Ekintza alderdiak bere elkartasuna adierazi nahi die beraien idei soilengatik espetxeratutako gazte hauei. Baita beraien senide zein lagunei.

Azken egunetan Donostiako Askegunearen borroka intsumisio eta desobedientzia zibilaren bidean urrats garrantzitsua izan da, eta erabat eredugarria. Azpimarragarria da ehunka pertsonen konpromisoa herri  harresia eraikitzen  arriskupeko gazteak babesteko, eta milaka herritarren parte hartzea elkartasun ekintzetan.

Guztiz salagarria Ertzaintzak erabilitako bortizkeria bertan bildutako jendearen kontra eta baita EAJ-PNVren konplizitatea atxiloketan eta atxiloketak era bortitzean burutzeko unean.

Garrantzitsua bada orain arte egindako guztia, garrantzitsuagoa da hemendik aurrera  egin beharreko lana, atxilotu gabeko gazteak babesteko zein  desobedientzia zibileko eta intsumisioaren bidean sakontzeko.

Soilik konfrontazio demokratiko baino aktiboaren bidez lortuko dugu presoak zein presoak izateko arriskuan dauden herritarren aldeko herri harresia sendotzen joatea. Atzo Espainiar Estatuak eta bere morroi autonomistek porrot politiko nabarmena jaso zuten Donostiako Bulebarrean.  Porrot hau sakondu behar da hurrengo astetan.

Eusko Ekintzan inoiz baino beharrezkoagoa ikusten dugu Euskal Herritarren eskubide zibil, sozial, politiko zein nazionalen defentsan arituko den elkargo eta auzolan nazional baten beharra.  Era honetan benetan egun hauetan Donostian landatutako hazia bere fruituak emango lituzke  epe laburrean.

Ezin ahaztu preso eta beraien senideen egoera. Ezta  beraien ideiengatik  espetxeratuak izateko arriskupean dauden  ehunka herritarrena. Beste aldetik eszepzio legeri ezberdinak indarrean jarraitzen dute, Alderdien Legea barne.

Borroka inoiz baino beharrezkoagoa da.

Euskal Herria, 2013ko apirilaren 19an.

Iker Rodrigo sortukidearen atxiloketa dela eta, Eusko Ekintzak lehenik eta behik atxiloketa politiko berri hau salatu nahi du eta aldi berean bere elkartasuna adierazi atxilotutako militanteari.

Iker Rodrigoren atxiloketa berriro ere agerian uzten du Espainiako Erresumaren norberaren zein kolektiboen askatasun falta.

Batzuek ilegalizazioen eta ideia soziopolitikoen jazarpenaren zikloaren amaiera aldarrikatu duten arren, gero eta nabarmenagoa ari da azaltzen egungo sistema politikoaren gabezi demokratiko larriak.

Salbuespen legeria indargabetzen ez den bitartean, alferrik da errealitatearen aurrean  hau horrela ez balitz bezala jokatzea. Horren lekuko, aste honetan izandako gainontzeko epaiak, atxiloketak, polizia kargak eta Cabacas auziaren inguruko datu berriak.

Iker Rodrigo oso larria den espetxe politikaren kasu bat salatzeagatik atxilotua izan da.

Inoiz baino beharrezkoa da eskubide zibil, sozial, nazional eta politikoen aldeko mugimendu zabal bat hedatzea Euskal Herrian, eta horretarako guk garbi esan nahi dugu  Adierazi Euskal Herria izan zen bezalako mugimendu baten beharra.

Euskal Herria, 2013ko apirilaren 15ean

Eusko Ekintza alderdiak adierazi nahi du Euskal Herrian euskal jendarteak zabaldu nahi duen garai berri hauetan kartzelak errepresaliatu politikoez hustu behar direla, betetzen jarraitu nahi dutela ematen du, berriz.

Zoritxarrez hau ez da horrela izaten ari, eta gero eta ageriago geratzen ari da maila guztietako errepresioa dela  Estatuen erantzun bakarra ezker abertzaleak bere osotasunean aukeratutako bide baketsuen aurrean.

Bide errepresiboen mantentze honen aurrean, euskal jendarteak konfrontazio demokratiko, erresistentzia zibil aktiboa, desobedientzia zibila eta etengabeko mobilizazioei eutsi behar diegu. Baketsua, baina konfrontazio eta konpromiso maila handikoa.

Era berean, alferrik da garai berriak bizi ditugula  behin eta berriz errepikatzea, atxiloketak, kartzelatzeak eta errepresio bere horretan mantentzen direnean. Ezin dira nahastu euskal jendartearen normalizazio nahiak Estatuek egunero erakusten diguten errealitate gordinarekin.

Eusko Ekintza